|
|
|
|
|
De Nachtwacht
De Nachtwacht
 De famylje Babayants ferbliuwt al mear dan 480 dagen yn ‘kerkasiel’ yn de tsjerke De Open Hof te Kampen. Dêr is 24 oeren deis in ‘tsjerketsjinst’ en salang der in tsjinst is meie se net oppakt wurde. De tsjerke fan de Lege Geaën hat dêr al meardere kearen hinne west. En sa hearden we dat it dreger wurdt om de nachttsjinsten op te foljen. Dêrom binne we nochris ôfreizge en ha yn de iere nacht fan 25 maart 4 oeren de wacht hâlden.
Ús tsjinst bestie ûnder oaren út it lêzen fan Johannes 18 en 19 ôfwikseljend mei sjongen fan de lieten 281, 547 en 587. Dit giet oer de skiednis foarôfgeand oan Peaske, dus wol aktueel.
Nei it skoft waard in ferhaal út Open Deur foarlêzen wat ferhelle oer it ‘út de doeken dwaan’. En nei it sjongen fan Ubi Caritas waard in ferhaal oer it libben fan de russise politieke aktifist Navalny foarlêzen. As ôfslúting ha we it liet ‘Kom as it tsjuster is’ songen. Tuskentroch ha we praat oer wat foarlêzen wie en kofje / tee dronken en wat iten. Der wie ek in frijwilliger by ús oanskoad. Hy draaide dêr om de 8/9 dagen in hiele nachttsjinst fan 20 oant 8 oere moarns en joech ús noch mear ynformaasje oer it kerkasyl.
De ‘Werkgroep vluchtelingen van de Raad van Kerken’ spant him yn om by it regear oandacht te freegjen foar de famylje Babayants troch brieven te stjoeren. Ynkoarten krije wy sa’n brief tastjoerd en we wolle jim freegje om dizze brief te ûndertekenjen. Dêrnei stjoere we ek dizze brief nei Den Haag.
It wurdt heech tiid om dizze minsken, dy ’t al mear as 12 jier hjir binne, op te nimmen yn ús lân. Se kinne gjin (oare) kant mear út!
Út namme fan de groep ‘Kerkasiel Kampen’
Feikje Bakker
| | terug
|
| |
|
|
|
|
02-04-2026
om